Ahlibeyt.ge xəbər verir ki, Gürcüstan "Əhli-beyt (ə) cəmiyyəti" və həmin cəmiyyətin nəzdində fəaliyyət göstərən "Əhli-beyt (ə) Aşiqləri Forumu" və "Zeynəb (s.ə) Qadınlar Birliyi"nin təşkilatçılığı ilə Ali Muhəmmədin (s) Qaimi, bəşərin xilaskarı Həzrəti Mehdinin (ə.f) təvəllüdü günü münasibətilə möhtəşəm tədbir keçirildi. 

Tədbir Kərbəladan Gürcüstan müsəlmanlarına hədiyyə olunan bayraqların təqdim edilməsi ilə başladı. Həmçinin aparıcı məşədi Azər Məmmədov  tədbirə daha da nuraniyyət qatmaq üçün Quran qarisi Kərbəlayi Rza Cəfərini Qurandan öz gözəl səsi ilə bir neçə ayə tilavət etmək üçün dəvət etdi. 

Sonra Azərbaycan Respublikasından təşrif gətirən Əhli-beyt (ə) məddahı Seyid Peyman Əhli-beytin (ə) şəninə şeir və ilahi nəğmələr səsləndirdi.

Tədbirin əsas xətibi olan Beynəlxalq Al-Mustafa (s) universitetinin Gürcüstan nümayəndəliyinin rəhbəri Hacı Davud Zarii çıxış edərək İmam Zamanın (ə.f) İlahi Peyğəmbərlərlə (ə) oxşar cəhətindən danışdı və əlavə etdi ki, Allah Peyğəmbərlərinə (ə) verdiyi fəzilətlərin hamısını İmam Zamana (ə.f) bəxş edib.

Əhli-beyt (ə) məddahı Seyid Peyman tədbirin sonunda da öz gözəl səsi ilə şeir və ilahi nəğmələr səsləndirdi və məclis "Fərəc" duası ilə yekunlaşdı.