Ramazan ayı – Allah qonaqlığı ayıdır. Bu ayın ali məqamını əldə etmək hər kəsə qismət olmur, bunun üçün bu ayın bərəkətlərinə dair mərifəti əldə etmək lazımdır.

Ramazan ayı – behiştin astanasıdır.

İmam Səccad (ə) "Səhifeyi-Səccadiyyə” kitabında Allahı həmd etdikdən sonra Ramazan ayını bizlərə belə tanıtmışdır: "Həmd olsun Allaha ki, dinini bizə inayət etmişdir və bizi Öz dininə aid etmişdir. Həmd olsun Allaha ki, o yollardan birini Öz ayı olan Ramazan ayı qərar vermişdir. Orucluq ayını, İslam ayını, təharət ayını, imtahan ayını, o ayı ki, Quranı onda nazil etmişdir”. 

Ramazan ayı – mələklərin yerə endiyi aydır.

Ramazan ayı 11 ayın sultanıdır və bu ayda elə gecə vardır ki, həmin gecədə mələklər yerə enər və insanları öz rəhmətləri ilə əhatə edərlər. Bu gecə Qədr gecəsidir. İmam Səccad (ə) bu gecə haqqında buyurur: "Gecələrinin min ayın gecələrindən fəzilət və üstünlüyü vardır və onu Qədr gecəsi adlandırırlar. O gecədə mələklər və Ruh Allahın əmri ilə nazil olarlar”.